Zastupjerjo předsydstwa ZSW pola Kamjenskeho wyšeho měšćanosty
Kedźbnosć za serbsku kulturu budźić
Kamjenc. Město Kamjenc chce přichodnje serbskej kulturje wjace kedźbnosće wěnować a ju do swojich lětnych programow zapřijeć. Tajki prěni poskitk hižo lětsa koncert w Kamjenskej serbskej cyrkwi swjateje Hany być. Wo tym dojednachu so 7. septembra w tamnišej radnicy zastupjerjo předsydstwa Zwjazka serbskich wuměłcow pod nawodom předsydy Benedikta Dyrlicha a wyši měšćanosta Roland Dantz.
Při konstruktiwnej rozmołwje, na kotrejž so z Kamjenskeje strony tež nawodnica Lessingoweho muzeja a zastupowaca nawodnica kulturneho zawoda dr. Sylke Kaufmann kaž tež zamołwity za zarjadowanja w měšćanskim dźiwadle Frank Hohlfeld wobdźělištaj, wuwi so zhromadna mysl wo trěbnosći, bikulturnosć w měsće atraktiwnišo prezentować a tak zajim wobydlerjow za poskitki serbskeje kultury budźić. K tomu ma so hišće w prěnim kwartalu rozmołwna wuměna mjez Kamjenskimi towarstwami a zarjadnišćemi a serbskimi towarstwami a kulturnymi institucijemi. Zdobom so dojednanachu, w Kamjencu komornej koncertaj z twórbami serbskich komponistow, we wobłuku Swjedźenja serbskeje poezije w tamnišich šulach rozmołwy ze literatami a šulerjemi kaž tež lětsa hišće wopyt čłonow ZSW z wědomostnym přewodom w Lessingowym muzeju přewjesć. Rěč bě dale wo wustajeńcach serbskeho tworjaceho wuměłstwa. Tule, tak wyši měšćanosta Dantz, skićeja so w jeho měsće mjez druhim na dworje radnicy, w foyeru měšćanskeho dźiwadła, słodarni a w Muzeju Zapadna Łužica přijomne móžnosće. Předwidźane je, z nawodnicu měšćanskeje biblioteki Marion Kutter so wo čitanskich zarjadowanjach serbskeje literatury za šulske dźěći dorozumić. Dale Roland Dantz namjetowaše, do Kamjenskeho šulerskeho pisanskeho wubědźowanja zapřijeć temu bikulturnosć. A. Wićaz
+++news+++news+++
Zetkanje z čěskim partnerom projekta Cil 3
Kritisce a přećelnje so dojednali
Budyšin (AW/SN). Mjezybilanca 2010 zahajeneho projekta Cil 3 „Měšćanska biblioteka Warnoćicy – mjezy překročace zetkawanje”, kotryž ma w čěskim a serbskim pomjeznym regionje spřistupnić zhromadne tradicije a kulturu, steješe 17. januara 2012 w srjedźišću posedźenja předsydstwa Zwjazka serbskich wuměłcow w Budyšinje. Město Varnsdorf a jeho biblioteka přewjedujetej wot Europskeho fondsa podpěrowany projekt w partnerstwje ze ZSW.
W přitomnosći delegacije z Varnsdorfa pod nawodom měšćanosty Martina Louki, do kotrejež přisłušeštaj mjez druhim nawodnica tamnišeje biblioteki Veronika Matysová a kooridnator projekta Milan Hrabal přisłušeštaj, hódnoćeše předsyda ZSW Benedikt Dyrlich dotalny wotběh projekta jako poradźeny, wosebje za młodźinu. Zdobom pokazaštej wobě stronje na njedostatki, kotrež měli so na dobro wuspěšneho zakónčenja projekta klětu wotstronić. Tuž so dojednachu, zo so nawodnej skupinje projekta 31. januara we Varnsdorfje zetkatej, zo byštej plan zarjadowanjow a temow hač do 2013 skonkretizowałoj a nadawki sej rozdźěliłoj. Zdobom chcetej so njekomplikowaneho realizowanja nadawkow dla po potrjebje zetkawać. „Sym wjesoły, zo smy so přećelnje dojednali a zdobom sym přeswědčeny, zo projekt klětu wuspěšnje zakónčimy”, rjekny na kóncu zetkanja měšćanosta Martin Louka.
W dalšim dypku dnjoweho porjada wobzamkny předsydstwo ZSW, lětuši Swjedźeń serbskeje poezije w septembru wěnować 190. narodninam Jana Rady-Serba Wjele a tute zarjadowanja wosebje w šulach dwurěčneje Łužicy přewjesć.
